عصفور مغرور ( للأطفال )

( 1 )

عصفور فى سن الخوف شطح

شده الفرح

بجناح يدوب يقدر يطير...........علو الزهور

رفرف ودار غنى بصوت كله مرح

م اليوم خلاص هقدر أطير

زى الفراشات الحرير

مخلاص جناحى صار كبير

عمره ميتأثر بجرح

( 2 )

يا أمى مش هفضل فعش

أفضل أسير بين ريش وقش

وكلام كتير

لسه متقدرش تطير

لسه متعرفش تطير

الريح بتاخد الصغار لمكان خطير

وغراب كبير

فوق الشجر مستنى فرصة طير صغير

شده الغرور

( 3 )

يا أمى فين كل الكلام ؟

أدينى أهه لسه بطير زى النسيم

وصوتى أجمل م الغنى

عصفور وطاير ف الهنى

ريشه ملون بالسعاده والمنى

يقدر على الريح والغراب

يقدر على كل الصعاب

عصفور أنا ومفيش هنا غيرى أنا

( 4 )

وفجأه من غير إنتظار

غاب النهار

غيمه وبصت ع البساتين الصغار

الريح بتصرخ فى الفضا

وغراب كبير فرد الجناح

صوته يدوى ف الهوى

عصفورنا كان حاير وخايف م الخلى

أصله مفيش غيره هنا

كل العصافير الكبار بجناح كبير

يقدر يطير وسط المطر

ميهمهوش ايه الخطر

لكنه عصفورنا الصغير

يقدر يطير وسط الرياح ؟

يقدر على الريح الجناح ؟

وادى الغراب فرد جناحه وبصله

بعيونه يقدر يقتله

وادى الصغير

شاف الغراب قلبه انكسر

م الخوف دفن

راسه ف ريشه وانتظر

ايه اللى مكتوب ف القدر

( 5 )

عصافير كتير ملت السما

واتجمعوا وكأنه طير واحد كبير

بجناح كبير

رجعوا عشان طيرنا الصغير

طيرنا اللى مليان بالغرور

شافهم غراب البين هرب

( 6 )

عصفورنا م اليوم اللى كان عرف السبب

انه الغرور

ياخد صحابه ف الحياه لمكان خطير

مفهوش رجوع

لو حتى صاحبه كان كبير

أصل الغرور

بيحول الشىء العظيم

لشىء حقير