إلى شهداء قوافل الحرية...........فضل الولد

كان الولد
شايل على اكتافه المدد
صاعين شعير
ودقيق بلون الحلم
يخبز أمانى ف السفر
ملهاش عدد
راكب سفينة نوح ولا همه
طوفان هناك تهديد هدد
كل الحكاية ان الولد
لما اتولد
كان صدر أمه ف البلد
مليان حليب
ممزوج بلون الدم ف البلد القريب
مخلوط بطعم الكره للبلد الغريب
لكن الغريب
كبر الولد

كان طوله متر وحبتين
كانت عيونه نجمتين
كان كفه ورقة شجر
يركع يقوم
يرفع إديه الطيبين
هوه الدعا نفسه
أصل الإمام عرفه.....هوه أبوه
كسر إدين المعتدين
رمل نساء الظالمين
وارحم ولاد المسلمين
آمين........آمين

ختم الصلا
والشمس باست جبهته
وف سكته
عشرين سنه فاتت
ماتت ملامح ف الوجوه
واتغيرت عاشت
لكن الولد هوه الولد
يركع يقوم
يرفع إديه الطيبين
كسر إدين المعتدين
رمل نساء الظالمين
زاد الدعا
وارحم ولاد المسلمين .....م الخائنين
آمين......آمين

ختم الصلا
والشمس باست جبهته
وف مخلته
لملم سنين عمره
وأنين دعا فجره
سجادته حتى وسبحته
باس الولد خد لعبته.....ومحبته
وشراع يشق البحر زى الريح
مش هاستريح
نفسى أصلى الفجر ف البلد الجريح
نفسى أبوس الشمس لما بتتولد
وبتتسند على أرض طاهره م الأبد
وللأبد
لكن الولد
إللى مخفش م الحسد
ولا م العتاد ولا م العدد
قبل اما يوصل للبلد
مات الولد
والشمس باست جبهته
وف سبحته
فضل الولد

» هذه هي الحرية التي نريدها